President Wladimir Poetin het Dinsdag tydens sy staatsrede ’n kernwaarskuwing aan die Weste oor die Oekraïne gelewer, ’n bilaterale kernwapenbeheerverdrag opgeskort, aangekondig dat nuwe strategiese stelsels op sy gevegsdiens geplaas is en waarsku dat Moskou kerntoetse kan hervat.

Die Weste se projek om ’n “anti-Rusland” te skep, wat nou in die Oekraïne geïmplementeer word, het ten doel om die historiese streke wat nou Oekraïne genoem word, van Rusland weg te skeur, het Poetin in sy staatsrede aan die Federale Vergadering op Dinsdag gesê.

Volgens Poetin sal Rusland sy oorlogsdoelwitte bereik en het hy die Weste verder daarvan beskuldig dat hulle Rusland probeer vernietig.

“Die elite van die Weste steek nie hul doel weg nie. Maar hulle kan ook nie nalaat om te besef dat dit onmoontlik is om Rusland op die slagveld te verslaan nie,” het Poetin bygevoeg.

Poetin het die Verenigde State van Amerika (VSA) gewaarsku dat dit die oorlog ’n wêreldwye konflik aanwakker en gesê dat Rusland sy deelname aan die laaste groot wapenbeheerverdrag tussen Moskou en Washington, opskort.

  • Reuters, TASS