Drie volwasse manlike voetgangers het matige tot kritieke beserings opgedoen nadat hulle gisteraand deur ’n ligte motorvoertuig in Stasiestraat in Brakpan gestamp is. Die bestuurder van die voertuig is ook in die voorval matig beseer.

ER24-paramedici was om 20:28 saam met die Ekurhuleni-metropolisie (EMPD) en GPG Rescue op die toneel. 

Die drie voetgangers is gevind waar hulle in die pad gelê het en die bestuurder was reeds in aanhouding deur die EMPD. 

Die kritiek beseerde voetganger het deur die voorruit van die Toyota Corolla gegaan.

Hy is deur ER24 behandel en hospitaal toe vervoer. 

Daar is gevind dat die ander twee voetgangers onderskeidelik matige en ernstige beserings opgedoen het en is deur GPG behandel en vervoer. Die manlike bestuurder is ook vir matige beserings deur GPG behandel en vervoer.

Gemeenskapspolisiedienste was ook op die toneel.