Sipho Hlomuka, LUR vir vervoer, gemeenskapsveiligheid en skakeling in KwaZulu-Natal, het ’n ondersoek na dreigemente en intimidasie van die familie van die Premier van KwaZulu-Natal, Nomusa Dube-Ncube, van stapel gestuur.

’n Groep mense, wat goed georganiseerd voorgekom het, het gisteraand die private huis van die Premier bestorm en die familie van die premier, insluitend haar kinders, geïntimideer. Dit is ’n voorval wat trauma en vrees by haar familielede, veral kinders, veroorsaak het.

LUR Hlomuka, wat ook die voorsitter van die Justisie-, Misdaadvoorkoming- en Sekuriteitskluster (JCPS) is, het gesê die onwettige optrede deur meer as 100 mense in die nag buite die Premier se woning hou ’n bedreiging vir die onskuldige familielede in.

“Die Premier is ’n openbare verteenwoordiger wat in staat is om alle sake te hanteer wat daarmee gepaard gaan om ’n openbare verteenwoordiger te wees. Om egter ’n privaat woning te bestorm en kinders te intimideer, is onaanvaarbaar,” meen Hlomuka. 

LUR Hlomuka het gesê dat die regering nie teen betogings is nie, maar om na die private woning van die Premier op te ruk, is ’n intimiderende taktiek en die provinsiale regering sal beslissend teenoor die betrokkenes optree.

“Ons sal stappe neem om die regte van kinders en familielede te beskerm wat nie vervolg moet word net omdat hul ouers ’n openbare amp beklee nie.

Antwoorde sal versoek word oor hierdie sekuriteitskending. Die getraumatiseerde familielede ontvang psigososiale ondersteuning om die trauma en beledigings wat veral deur die premier se kinders waargeneem word, te hanteer,” voeg Hlomuka by.

Die Suid-Afrikaanse Polisiediens (SAPD) moet die wettigheid van hierdie optrede ondersoek.

“Protesaksies word ingevolge ons Grondwet toegelaat, maar memorandums word helder oordag by staatsgeboue oorhandig en nie laataand by iemand se privaat woning nie. Hierdie optrede het onheilspellende motiewe en regverdig behoorlike aanspreeklikheid,” het LUR Hlomuka gesê.

Die polisie sal ‘n ondersoek na die oortredings van die Wet op Openbare Byeenkomste en ander relevante wetgewing van stapel stuur.